آنبارا اؤپوش

مرتضي مجدفر

کيچيک قاپي‌نين آرخاسيندا يئرلشن بؤيوک آنبارين گؤرونمه‌سينه، هئچ بير ايشيق لازيم دئييلدي. آنبارين ايچريسينده اولان ور- وساييلين او قده‌ر پاريلتي‌سي وار ايدي کي همن قارانليقدا دا گؤرونوردو. آنجاق هاميدان اؤنملي، آنبارين ايچينده اولان وسيله‌لر ايدي.بو قيوير- زيويري آنباردا ساخلاماق، او ياشدا بير قوجايا، عجيبه بير ايش ايدي: بالاجا حربي گمي، تانک، جوربه‌جور اندازه‌لرده راکت‌لر، بالا- بؤيوک سيلاحلار، قومپارا، ال بومباسي، توفنک و توفنک گولله‌لري و حتي مختلف اندازه‌لرده پيلوت‌سوز اوچوش آپارات‌لاري.
ائله نظره گليردي کي وسيله‌لرين هاميسي قيزيلدان‌ديرلار يا خود قيزيل سو ايله بويانيب‌لار.
قوجا کيشي، هر گئجه کي عادتي اوزه‌ره، بير داها آنبارين ايچريسينه باخدي و دوداق‌لاري قاچمادان، گولومسندي. آنجاق بير آز سونرا هنده – ورينده بير کسين اولماماسيني دوشونه‌رک، اوجا سسله قاققيلدادي، آنبارين قاپي‌سين باغلادي و ايللر بويو ياتديغي و ميتيله دؤنموش يورغان-‌ ‌دؤشه‌يين اورتاسينا گيره‌رک، آز بير زاماندا يوخويا جومدو.
بو وسيله‌لري آنبارا دولدورماغين سببي معلوم دئييلدي و او ياشدا بير قوجايا بو وسيله‌لرين ساخلاماسيندان نه لذت ايسه ياراناجاقميش دا بللي اولماميشدير.
قوجا کيشي، او گئجه سون اولاراق آنبارين وسايلينه باخماسيندان و صاباح سحر يوخودان اويانماماسيندان خبرسيز ايدي. هم ده هفته‌ده اونا اوچ دؤنه يئييب – ايچمک و سورسات گتيرن قديمکي دوستونون قصديندن و ايللر بويو اونو ايزلمه‌سيندن هئج نه بيلميردي. او قوجانين حياتيني ايزله‌يه‌رک، اونون اؤلوم خبريني، اؤلومو آرديندا اولانلارا وئرمک و آنبارداکي وساييلدن اؤز پاييني گؤتورمک قصدينده ايدي، حال بو کي اونا آنبارداکي وساييلردن هئچ بير پايين چاتماماق امکاني دا وار ايدي.