بير حئکايه حئکايه‌سي

ريحانه پورغني

چانتاني آچيب، أشيالاري بير ده گوزدن کئچيرمه قرارينا گلدي، هر شئيين حاضير اولماسيندان أمين اولماق ايسته‌ييردي. تَپ-تَزه دفتر‌لر، رنگ‌به‌رنگ قلم‌لر، سو قوم‌قوماسي، يئمک قابي، هر شئي حاضير ايدي. أليني دوم-دوز اوتولنميش، قيرميزي اوخول فورماسينا چکدي. بارماق‌لاري، قيزينين گووده‌سي ايچينده وارميش کيمي، محبت‌له فورمانين اوستونده سوزولدو. مطبخه ساري گئتدي.
چايداندا قالان چايي ايستکانا سوزدو. ايچديگي چاي‌لارين نئچه-‌جي اولدوغونو بئله هئچ بيلميردي، هرحالدا بير چايدان چايي قورتارميشدي. لوش ايشيقلي مطبخده، ماسانين داليندا اوتوروب، سويودوجو موتورونون ضعيف ويزيلتيسينا قولاق آسيردي، ائوين سس‌سيزليگينده سس‌لر داها آيدين ائشيديليردي. گوزو ماسانين اوستونه سريلميش سوفرانين گول‌لرينده گزينيردي. ساري، نارينجي يئمک لکه‌لريني گوروب، »صاباح سوفراني يومالي‌يام« دوشونوردو. قندي ألينه گوتوروب چايا باتيراندا، قند بارماق‌لاري‌نين آراسيندان بوراخيليب چايا جومدو، قندين چايدا أريييب يوخ اولماسينا باخيب، دوداق آلتي »سئوينه‌جه‌يم« دئدي. چايي ايچيب، ايشيق‌لاري سوندوروب، ياتماق قرارينا گلدي.
حيات يولداشي چوخدان ياتميشدي، ياواشجا ياتاغين قيراغيندا اوتوروب، موبايلي‌نين ساعاتيني آلتي ياريما قوردو، ياتاغا اوزاندي، يئنيدن موبايلي گوتوروب، ساعاتي 6:15 دقيقه‌يه چکدي. راحات بير مووقع سئچيب، ياتماغا چاليشدي، أليني ياسديغين آلتينا قويدو، اوزو اوسته اوزانيب، گوزلريني يومدو. اوزونو ياتماغا زورلادي، صاباح، قيزي اوخولا باشلاياجاقدي. دئمک اولار، او قيزيندان چوخ هيجانلي‌ايدي، اما بو هيجاني ياتيشديريب، ياتمالي ايدي. ساغ طرفه، حيات يولداشينا ساري دونور، هميشه‌ليک عادتي اوزَري، نفسيني اونون نفسي‌ايله اويغولاشديريب، ياتماغا چاليشير. اما اولمور، ايچينده‌کي جوشقو اونون راحات و دوزنلي نفس آلماغينا مانع اولور. اوقدر چايي ايچديگي اوچون اوزونو قينييير. گوزلريني تاوانا زيلله‌ييب ذهنينده بير حئکايه باشلاديب، اونو ذهنينده جانلانديراراق يوخويا دالماغا چاليشير، اما بو گئجه ذهنينده‌کي قوش بير بوداقدا اوتورماق بيلمير. واز کئچيب، گوزلريني يومور. شيديرغي ياغيش اوتاغين پجره‌سيني دويجله‌يير. يورغاني باشينا چکير. ياشيل بير کيتاب حيطتين اورتاسينداکي حوووضا تولازلانير. حووضون ياغيش‌دان دالغالنميش سويو داها دا دالغالانير، کيتابين ياپراق‌لاري ايسلانيب، ياواش-ياواش سويا جومور. ياشيل کيتاب حووضون ماويليگين‌ده بوغولور. بير کيتاب داها حيط‌ده اوچوشور و بيري داها. ياشلي گوزلريني، يوموق گوز قاپاق‌لاريينين دالين‌دا گيزله‌ديب، داملا‌لارين ياناق‌لارينا آخماماسينا چاليشيردي. آجي بوتون قلبيني جايناغينا آليب، قلبي سيخسنتي‌دان پارتلاييردي. چکديگي آجي زهر کيمي قانينا آخيب، بوتون اورقان‌لاريندا دولانيردي. قيچ‌لاريني قارنينا ييغيب، ألي ايله يورغاني قارمالاييردي. گوزلريني آچيب ديوارا ساري دوندو. قارانليق گوزلريني هجوما آلدي.
– آه آتا، کئشکي سنده ده بير شمس کرامتي اولاردي، او کيتاب‌لار او حوووض‌دان، او ياغيش‌دان قورخو چيخارديلار، من ده مولانا کي »قيل و قال« دان چيخيب، »وصف و حال« گيررديم. اوز-اوزونه دئدي.
ياغيشلي بير پاييز آخشامي ايدي، اوفکه‌لي گويون قاباران پارلاق دامارلاري هاوادا چيرپينيردي.
– هله اوقدر بئ‌‌غيرت اولماميشام، قيزيم شعر درنک‌لرينده اوزگه اوغلانا عشق شعرلري اوخويا. دده‌م گورو بير داها دا ائشيدم، بيلم او قورومساق‌خانا درنَگه آياغين قويوبسان، آياغين سينديرارام. بو گوندن ده درس، کنکور کيتابيندان باشقا بير کيتاب بو ائوه گيرمه‌يه‌جم. باشين سال آشاغييا، درسيني اوخو. ائله ايش گورمه قويماييم بو درسي ده اوخوياسان.
کيتاب‌لار اوتاغين کيتابليغين‌دان بير-بير حيطه تولازلانيردي، بير نئچه‌سي حوووضا دوشوب، قالاني دا ياغيشين آلتيندا ايسلانيب، أزيلن صفحه‌لري يئره ياپيشيب، ياسلي‌لار کيمي پالچيغا بورونوردو. اوتاغيندا بوزوشوب اوتورموشدو، آتاسينن قورخونج، قارانليق بير قويو کيمي آچيلان گوزلرينين گيله‌لري اونو دهشتلي بير بوشلوغا سوروکلويوردو. او آن‌لار‌دا بير دوز خط گوزونون اونونده اوزانيب گئديردي. سي‌سي‌يو اوتاق‌لارينين مانيتوروندا، قلبين دوردوغونو خبر وئرن او اوفوقي خط. اونون قلبيين‌ده‌کي حيس‌لين اولوم خطي. او گون اوره‌گينده ايکي سئوگيني اولدوردو، بيري يازيچي اولماق سئوگي‌سي، بيري ده وولکان پوسکورن باخيش‌لارييلا قلبينه اود سالان او شاعير اوغلانين سئوگي‌سي. او گون‌دن ايستک و آرزولاريني اوز يالقيزلغيندا، دومانلي باخيش‌لارينين اوجقاريندا گيزلتدي، حسرتي، حسرت اوستونه قويوب، بيريکديردي.
يورغاني اوستوندن آتير، ديرناق‌لاري يورغانا ايليشير، بيري‌نين قيراغي سينير. سينان ديرناق تورپو کيمي روحونا، فيکرينه چکيليب، دوزونولمز بير عذابا چئوريلير. قارانليقدا يانينداکي چکمجه‌ني قاريشديراراق ديرناق قايچي‌سيني تاپير. دورور، توالته گئديب، ديرناق‌لاريني توتماغا باشلايير. گوزو آيناداکي قادينا ساتاشير، آلنين‌داکي نازيک جيزگي‌لره، قومرال ساچ‌لاري‌نين آراسينداکي آغ تئل‌لره، گوزلري‌نين آلتين‌داکي گويومتول حالقالارا. آلا گوزلري بير آز سولوب دورغون بير گوُلو يانسيتسا‌دا، اوزو اولغون بير قادين اوزو اولسا دا، باخيش‌لارينين درينليگينده هله ده او اون‌سککيز ياشلي قيزين آرزولاري ياشاييردي…
يازي‌لارلا دولو، چيرکدن آغ رنگي سارييا دونموش توکوک ديوارلي صينيفدا، قارا مغنعه‌لي قيزلار،‌ پاسلانميش، اوست‌لري ياديگارليق قازينتي‌لارلا دولو نيمکت‌لر داليندا سيخيشيب اوتورموشدولار. مبادا معلم تخته قاباغينا چاغيرا دئيه، هره‌سي گوزلريني بير طرفه تيکيب، معلم‌له گوز-گوزه گلمک‌دن چکينيرلر. بير تک اونون دالغالي، جوشغون گوزلرندن سئواي. خانم قراجه‌داغي قارا پارلاق ساچ‌لاريني مغنعه‌نين آلتينا تيخيشديريب، باخيشيني گوزلوگونون اوستوندن صينيفدا گزينديرير. او گوز‌لريني معلمين اوزونه زيلله‌ييب‌، صبيرسيزجه خانم قراچه‌داغي‌نين ايري گيله‌لي قارا اوزوم کيمي أتلي، پارلاق دوداق‌لاري‌نين آراسيندان آدي‌نين چيخماسيني گودور. سوبانين ايستي‌سي ايله قيزلارين نفسي بيرلَشيب، بورکولو صينيفا مورگولنمه هاواسي چوکموشدو.– پاشايي، دور پنجره‌لردن بيريني آچ. معلم دئدي........