عاشيقلار قفه‌خاناسي

زامانلا حرکت ائله‌ديک. گؤرديک بو دوکانا هئچ کس گلمير. بورا عاشيق‌لارلا مشهور اولموشدو، داي ييغيشديرديق، وئرديق اجاره‌يه. الان اوردا لباس ساتيرلار، ولي ورثه آراسيندا بير يادگاردي دده‌ميزدن بيزه قاليبدي. بيرده کي اوننان خاطره‌لريميز واردي.
1.انقلابين اول‌لرينده »سرتيپ ارزيلي« کي »سرلشگر بيدآبادي«‌نين يئرينه گلميشدي و تبريز پادگاني‌نين فرماندهي اولموشدي؛ تبريزي دولانديران او ايدي. روبرودا قارداشي حاجي بؤيوک‌ين دوکاني وار ايدي، قنددن چاي‌دان ساتاردي. بيرگون تمام بازارچا اهلي ييغيشديلار، فرماندهين قارداشي »حاجي بؤيوک ارزيلي‌ني« اؤتوردولر قاباغا، گلديلر بيزيم دوکانا کي، »عاشيق‌لار گره‌ک اوخوماسين!« آقام دئدي: »عيبي يوخ، بولارين هر بيري‌نين خانواده و اهل و اعيالي وار. گره‌ک اوخويالار.
يوخ، اگر سيز دئييرسيز اوخوماسينلار عيبي يوخ، 75نفر بوردان چؤره‌ک آپارير، دؤرد- بئشي من‌نن با هم اولسون، من اولارا چؤره‌ک وئريم؛ سيز ده هره‌ز بيرين دوکانا قويون، بولار دا هره‌سي بير چؤره‌ک آپارسينلار. هئچ بيري قبول ائله‌مه‌دي.
الله رحمت ائله‌سين، داي آديني دئميرم؛ بير بالابانچي وار ايدي، سرهنگ ارزيلي‌يه دئدي کي، »سنه دئسه‌لر زيرنا چالما، قويارسان آدامين قولاغي‌نين ديبيندن. من زيرنا چالماغي اؤزومه کسب ائله‌ميشم کي، اهل و عياليما چؤره‌ک آپارام.« داي بير سؤز دئيه بيلمه‌ديلر، چيخديلار گئتديلر.
2.»عاشيق حسين جوان« دان بير کاسئت گتيرميشديلر منه؛ عاشيقدان سوروشورلار کي، »اوستاد سنين نه آرزون وار؟« اوستاد دئيير: »تبريزدن بير خاطره‌لر دئنن منه!« گوينده دئيير: »گولوستان باغي‌نين قاباغيندان کئچيرديم، ياغيش امان وئرميردي. گؤردوم هامي گئدير بير يئره ساري. من ده اولارا قوشولدوم. بير اوستو اؤرتولو بازارا ساري گئتديم. بير خوش سس گلدي قولاغيما. عاشيق سسي‌ ايدي. گئتديم، من ده اوتوردوم اوردا. گؤردوم کي بير نفر (همان گوموش کمر عاشيق علعسگري دئييردي او نام نشانلا؛ او پاپاق باشيندا، شال گئيينميش)- دئدي کي، »عاشيق، بير دنه ده توفارقانلي عباس‌دان «دومان گل گئت بو داغلاردان!«ي اوخو!«
چؤندو عاشيق منه ياواشجانا جواب وئردي کي، »دومان بئله کي گليبدي، اَل چکن دئييل.« سورا گوينده سوروشور کي، »عاشيق، دئييرلر سازدان کوسوبسن! سازدان اينجييبسن!« اوستاد دئيير: »يوخ، سازدان کوسماق اولماز؛ سازدان اينجيماق اولماز. نه قدر حيات وار، اودا زنده‌دير/ صنعت، عاشيقي‌نين سينه‌سينده‌دير.«
3.کئچميش عاشيق‌لار ائلدار ايدي‌لار. بيز اؤزوموزده اولارا ائلدار دئيرديق، ياني هامي‌نان قونوشارديلار؛ هامي‌نان‌ احترامنان کئچينرديلر. بونلارين ادب، کمال و احترام‌لاري واريدي. قفه‌يه هر هانسي آغ ساققال يا جوان عاشيق کي گلردي، بير بيري‌نين اياغينا دوراردي‌لار؛ ال وئررديلر؛ بير بير هاميسي‌نان اؤپوش گؤروش ائلرديرلر. چوخ احتراملي ايدي‌لر. ايندي مثلا اورميه‌دن »عاشيق دهقان«، يا »عاشيق درويش« قوناق گليبلر.
آيري عاشيق‌لار اؤز وقت‌لري کي ساعات ياريم ايدي وئررديلر اونا کي، بو قوناغيميزدي. اؤزلري اوخومازدي؛ عاشيق درويش اوخوردو، عاشيق دهقان اوخوردو. يا تورکيه‌دن بير »اسلام« آديندا عاشيق گلميشدي، اونا وقت وئرديلر اوخوسون.4.عاشيقليق هنري بيزيم قفه‌دن چوخ يئرلره ياييليب گئتدي. کندلردن بئله ياييلدي. آخرده رسم اولموشدو کي هر کس هفته‌نين اولين‌دن آخرينه‌جن ايشليرديلر، پنجشنبه و جمعه‌ني تؤکولوردولر قفه‌يه.
ايينه سالماغا يئر اولمازدي. داي چاي اوردا مفهومي يوخيدي؛ قاپي آغزيندا نفره بير دنه نوشابه آچارديق. بو حدده اورا مشهور اولموشدي کي تمامي کندلردن، تمامي شهرستانلاردان هر کسدن سوروشوردون »عاشيق‌لار قفه‌سي« (گجيل ده مشه احمد عمي‌نين قفه‌سي) دئيرديلر کي هارادير. چوخ ساغ اولون! سون