اَن قيمتلي ساعات
بولگه لر سرويسي:ايکي اوچ گون ايدي بيزيم قهوه‌خانايا گلير، دينج بير کؤشه‌يه چکيليب آکواريومدا ترپه‌شن باليق‌لارا زيلله‌نير و قلياني سوموروردو.
بو يئر آدامينا اوخشاميردي. چاي-قليان پولو اولماديغيندان ساعاتيني گيروو قويموشدو يانيمدا. بير گون گئج ساعاتلارا قده‌ر قهوه‌خانادا قالدي. گؤز آلتي مني سوزور، يالاندان اليني ساليردي نه‌ايسه. ال-آياق چکيلندن سونرا اوتانا-اوتانا: — »مني بو قهوه‌خانادا ايشله‌درميسن؟!« -دئيه سوردو.من ده: — »آي قارداش، بو قهوه خانادان نه چيخير کي، هله شاگيرد ايشله‌دم!« دئديم.
بونو دا دئييم کي، بو کيچيک شهرده منيم ايشلتديييم قهوه‌خانادان يوخسول قهوه‌خانا بير ده منيمکي ايدي. خياوان قيراغينا گوجوم چاتماديغيندان، دالدا بير محلله‌ده کيرالاميشديم بو قهوه‌خاناني. هئچ بير ايمکانات بئله يوخوم ايدي. ايمکانسيزليقدان، يئمک اوچون تکجه اوملئت و پنير چؤرک تاپيلا بيلردي. اصيل ايشيميز آجي چاي و قليان ايدي.
— »هئچ بير دستمزد ايسته‌ميرم، بير قالماق يئري و يئمک-ايچمک منه بس ائده‌ر« دئدي.
25 ياشيندا، اورتا بوي، گولر اوز و ساکيت بير اوغلان ايدي. نه ايسه گولوشو بيرآز غملي و زورلوقلو گؤرونوردو. ذئهني هميشه مشغول گؤرونورسه ده، ايش‌لريني واختلي-واختيندا يئرلي-يئرينده گؤرور، باليق‌لارين سويونو عوضله‌ييب، يئميني وئريردي. موشتريلرله ادب و نزاکتله رفتار ائديردي. اوتانجاق سير-صيفتيندن دوروستلوک و دوزلوک ياغيردي، آنجاق بو شهره سورگون ائديلميش اولدوغونو سؤيله‌ييردي. آنلاشماغيميزا باخماياراق، من هردن بير، بير جيب خرجلييي ده وئريرديم اونا.بير ايله ياخين بو قهوه‌خانادا باهم ايشله‌ديک. اوزوموز بيربيريميزه اؤيره‌نميشدي آرتيق. سؤز ائشيدن و يانيملي بير اوغلان ايدي. سؤزه ياخشي قولاق آساردي. اوره‌يي ياناردي آداما. بير گون، قهوه‌خانا خلوت ايدي. ايکي چاي سوزوب، بير قليان چاغلاييب، اوردان-بوردان دردلشمه‌يه باشلاديق. اپ ايچينه قاپالي بيريسي‌يدي.
من درديمي تمامي‌يله آچيب، اونا سؤيله‌ديم. بئش ياشلي قيزيم آکواريوم قارشي‌سيندا باليق‌لارلا دانيشيردي. حيات يولداشيمين بؤيره‌ک‌لرينين چورومه‌سيني و تئزليکله عمليات اوچون اوتوز ميليون پول حاضيرلامازسام، حيات يولداشيمين حياتي‌نين تهلوکه‌يه دوشه‌جه‌ييني اونا دانيشديم. اليني بالاجا قيزيمين ساري ساچلارينا چکيب، اوزوندن اؤپوب بير آه چکدي: — نيگران اولما، دوزه‌لر! دئدي.ائرته‌سي گون قهوه‌خانادا ماسامين اوستونده بير گونده‌ليک(روزنامه) گؤردوم. هئچ بير گونده‌لييه آبونه دئييلديم ده. گونده‌لييي، بورايا کيمين قويدوغونو بيلمه‌دن، گونده‌لييي گؤتوروب بير کؤشه‌يه چکيلديم. ايلک صفحه‌ده شاگيرديمين شکيليني گؤرونجه شاشيرديم.
آگهي‌ده: »بو قاتيلي هر کس اله وئرسه، اوتوز ميليون جايزه‌سي وار« دئيه، شکيلين آلتينا يازيلميشدي. گونده‌لييي گؤتوروب حئساب-کيتاب ماساسي‌نين آرخاسينا کئچيب هئچ فيکيرلشمه‌دن نؤمره‌ني توتدوم. او، سونسوز بير آرخايين‌ليق ايچينده تميزليکله مشغول ايدي.
ياريم ساعات سونرا ايشيمدن پئشمان اولموشدوم. آنجاق پوليس‌لر منه بير باغلي پاکئت وئريب، اونو ياخالاييب، ماشينا دوغرو آپارديلار. اونو منيم لوو وئرديييمي بيلمه‌سين دئيه، يالاندان ساختا اويونلار چيخارتماغا باشلاديم.
او منه باخيب اوره‌کدن و ايچدن‌ليکله گولومسه‌ييردي. بو بير ايلده، بو آرخايين و رضايت دولو گولوشو ايلک دفعه ايدي اونون اوزونده گؤروردوم. گولوشونده‌کي صداقت و صافليق‌دا اولان آينادا، نه قده‌ر کيچيک و چيرکين اولدوغومو آچيق آيدين گؤردوم اؤز گؤزلريمله. اؤزومه اؤلوم آختارديم. ايختيارسيز اولاراق گؤزلريمين ياشي آخيب اوزومه تؤکولدو. ايلک گؤروشوموزده، قهوه‌خانادا گيروو قويدوغو ساعاتي اونا گئري وئرمک ايسته‌ديم. آلمادي: »نئينيرم! منه ساعات لازيم دئييل« دئدي. ماشين حرکت ائله‌ييب، گئتدي. نسه بير يئرده ايشغال اولدوغونو، يا فداکارليق ائده‌رک بير قتلي بويون آلديغيني دوشوندوم. او بؤيوکلوکده اينسان قاتيل اولا بيلمزدي.
هه آتام بالاسي! نه‌ييني سؤيله‌ييم داها؟! ايندي اؤزومدن آجيغيم گلير. اليمدن نه گلر آرتيق؟! ماسامين اوستونه قويدوغو او گونده‌لييي سونسوز بير اوزونتو و شرمنده‌ليک ايچينده جيريب يانديرديم. حيات يولداشيم عمليات اولوب حياتا دؤنموشدو. قهوه‌خاناني ييغيشديريب، خيابان قيراغيندا بير ساعات توکاني آچديم. اليمه ياخشي پيس هر جور ساعات گلير گئدير. آليب ساتيب عائيله‌مي دولانديريرام. اونون باغيشلاديغي او ساعاتي، دونيانين هئچ بير ساعاتي‌يلا ده‌ييشمه‌رم…
تاریخ: 1404/08/25 11:21 ق.ظ | دفعات بازدید: 1834