آتامدان قالان ائو

سحردن اوْروج اوْلدوغوم اوچون،هم ده آلتي- يئددي ساعات زلزله‌دن سوْنرا چيرپينديغيما گؤره، کاميل صورتده بئزيکميشديم. منله برابر، جيب تئلفونومون باتريسي دا سوْنا چاتيردي.موْبايليمين چيراغي سؤنرکن،ائله بيل من ده ييخيليب، ائله خانيميم و بؤيوک قيزيمين يانيندا يئره دوشموشم.
سوْنرا ايسه يارديمچيلار بيزي زئرزميدن قوُرتاريب، ائشيگه چيخاريبلار. ايندي ايسه بوُردايام، تبريزين امام رضا خسته‌خاناسيندا؛قيچيم گچ‌ده دير، اؤزوم تخت اوسته.بوُ گون زلزله‌دن اوچ گون کئچير. عمومي‌حاليم ياخشي دير و قيچيمين سينيغي ائله ده مني سينسيتمه‌ييبدير.اوْ جور کي ائشيتميشم بوُ گون- صاباح مني بوُرادان بوُراخاجاقلار.
منيم آديم اصلان اؤلسا دا، فيکر ائديرم آنام بوتون اصلانلارين باشچيسي‌دير.ائله بوُ ايکي گونده،نئچه دؤنه مني گؤرمک اوچون بوُرايا گليب دير.هله آللاها شوکور کي عميمين ائوي تبريزده دير و اوْرادا قاليرلار.خانيميم دا دونن بوُرايا گلدي.اوْنو دا آياق اوسته پانسماندان سوْنرا بوُراخيبلار.بؤيوک قيزيم،لاله‌نين ده بير قيچي، هم ده بير قوْلو سينيب،ايندي عميم‌گيلده دينجه‌لير.دئمه‌لي زلزله اوْلان واخت، اوْنلار اوسته‌کي اوْتاقدان، ايستي اوْلدوغو اوچون زئرزمي‌يه گئديرلر،ائله منيم هَمَن چؤره‌گه چيخديغيم زامان و بوُ کؤچمه اوْنلارين جانيني قوُرتارير.
دونن خانيميملا آنام بورايا گلن واخت،منه يادداشت يازماق اوچون ايسته‌ديگيم کاغذ- قلم گتيرديلر. بالاجا بالام،چيچکدن سوْروشدوم. خانيميم تئز اوْتاقدان ائشيگه چيخدي. آنجاق آنام دئدي:»عمي‌نين نوه‌لري ايله اوْينايير. اوْ گون زلزله گلنده ده يوُخاريدا اوْيناييردي…«
دئديم:»يوُخاري دا؟«
آنام سؤزومه سؤز قاتدي و دئدي:»يوُخاري- ‌آشاغي! نه بيليم. صاباح مرخص اوْلسان، گئده‌‌ريک ائويميزه. من کي‌اوْروجلوغون بوُ نئچه قالان گونونو ده اوْروج توُتمالييام.«
دونندن اليمه کاغاذ- قلم گلديکدن سوْنرا، اوْخودوغونوز بوُ يادداشتلاري يازديم. بوُ گون مني مرخص ائده‌جکلر. گؤره‌سن اوْ گئجه موْبايليمين چيراغيندان ساچيلان آز ايشيغين آلتيندا آرامجاسينا آنامين يايليغي‌نين آلتيندا ياتان چيچک بالامي‌بير داها دا گؤره‌جه‌يم مي؟! سون