آتامدان قالان ائو

مرتضي مجدفر

بيرنجي بولوم

داها ايره‌لي گئتمک امکانسيز ايدي. امدادي مأمورلار و ماشين‌لاردان هئچ نه خبر يوْخ ايدي. ائله بوُ حالدا،بيلميرم نه‌دنديرسه مدرسه ياديما دوُشموشدو.گؤره‌سن اوُشاقلاردان اؤلوب-‌قالاني کيم دير؟ معلم‌لر و باشقا امکداشلاريميز نئجه اوْلوبلار؟هم ده ايللر دير مدرسه‌ده چيخارتديغيميز اوْيون بازليقلاري خاطيرلاييرديم.
نئچه ايلدير آذر آييندا مدرسه‌لرده »زلزله قاباغيندا مقاومت« آدلي بير ايشلر گؤروروک. من بوُ تعليم-‌ تربيه‌وي ايشلره قاتيلاراق،هر بير زامان احتياطلا ياناشميشام. منجه زلزله قاباغيندا مقاومت،تکجه مدرسه اؤيرتمه‌لري ايله دگيل، بير چوْخ باشقا زادلارلا يئرينه يئتيريله‌جکدير. ائويميزه ساري قاييتديقدا، خلقين خام کرپيچ‌دن دوزه‌لينميش خارابا قالميش ائولريني،يئرلرينده محکمجه‌سينه آياق اوسته دوُرموش دولتي بينالارلا مقايسه ائتديکده، بوُ احتياطلي ياناشماما داها دا آرتيق اينانيرديم.
ايکي ساعاتدان سوْنرا و ساعات آلتي‌ياريم حدودلاريندا ائويميز اوْلانين کوچه‌نين آغزينا چاتديم.جيب تئلفونلاري ايشله‌ميردي. زلزله گلندن اوْ ساعاتا قَدَر يوز دؤنه‌دن آرتيق ائويميزه و خانيميمين جيب تئلفونونا زنگ ائتميشديم،آنجاق هئچ. امدادي تئلفونلارين ايسه هئچ بيري جاواب وئرميردي.
ائويميزه گئدن کوچه‌نين آغزيندا،ايکي هؤندور بينا بوتونلوکله اوُچموش و کوچه‌يه گيرمک امکانيني اليميزدن آلميشدي. بير نئچه نفر تانيش،دوْست،فامئل و قوْنشو کوچه‌نين آرديندا ايديلر.‌هاميسي منيم کيمي‌پوْزغون،توْز- توْرپاق گئييملي و ناراحات ايديلر.هامي‌منيم کيمي‌ائوده قالانلارين نيگراني و آغلار گؤزلو ايديلر.
توْرپاقلاري ائشه‌له‌ييب،کوچه‌يه گيرمک ايسته‌ييرديک. يارديم ائدنلرين هئچ بير پروگرامي‌يوْخ و تام معنادا آواراچيليق و انضباط‌سيزليق ايدي.
ساعات سکگيزه چاتميشديق و هله کوچه‌ميزين گيريش يوْلو آچيلماميشدي. بوُ ايکي ساعاتين ايچينده،بئش-‌آلتي نفري يارالي و بير-ايکي نفري ده اؤلموش، اوُچولموش بينالارين قاليق‌لاري‌آلتيندان چيخارتميشديلار. داها من ده ائويميزده کي عزيزلريميزي ياددان چيخارديب،کوچه باشيندا ييغيشانلارا يارديم ائديرديم.ائوده قالان گؤزومون ايشيقلاريني قوُرتارماق اوچون، هله‌ليک مددچي اوْلمالي ايديم.ساعات دوْققوزا بير آز قالاندا يوْل آچيلدي و کوچه‌نين ايچينه گيرديک. کوچه‌نين ايچي ده،ائيشکده کيمي‌ايدي.بوتون بينالار ييخيليب،زلزله‌دن بئش-آلتي ساعات کئچسه ده، هر يئر توْز-توْرپاق ايدي.ييخيلان دام- دوُوارلاري، بئل- کولونگ ايله يوْخ، اليميز ايله اويان- بوُيان ائديرديک.کوچه‌نين ايچينه گيررکن،داها مددچي اوْلدوغومو اوُنوتدوم و دوز ائويميزه ساري يوْلا دوشدوم.قاپيميزين قاباغيندا آياقلاريم سوُستالدي:»بيردن گؤرمه‌ييم دؤردو ده اؤلوبلر؟!«
قاباغا گئده بيلمه‌ديم. اليمي‌جيبيمه سالديم و قاپيني آچماق اوچون، آچاري آراماغا باشلاديم. آچار، جيبيمه گئدن بارماقلارين آراسيندا اوْياندي،آنجاق گؤردوم دوُواريميز اوُچوب، قاپي ديزه چؤکوب و آچارسيز ايچري‌يه گيرمک، داها‌هامييا مومکوندور.
دمير قاپي‌نين اوستوندن حيه‌طيميزه آتيلديم. ائودن هئچ نه سس گلميردي. ايچري گيرمگه قوْرخوردوم.هاوا داها قارانليقلاشيردي. بئله دوشونوردوم آذان واختي دير.
منيم آتامدان قالان ائو، ايکي قاتلي بير ائو دير. ايکي قات دئديکده،يئني طبقه‌لر- زادلار يادينيزا دوشمه‌سين. بير طبقه زئرزمي‌دير، اوْنون اوستو ايسه اوْيان- بوُيانلي ايکي اوْتاق، آراسيندا بير بالاجا دهليز، دهليزين داليسندان دا زئرزمي‌يه گئدن نئچه پيلله.بالاجا حيه‌طيميزدن بوُ ايکينجي طبقه‌ده اوْلان اوْتاقلارا دا نئچه داش پيلله واردير.ايکي اوْتاق بوتونلوکله اوچموش و وسيله‌لريميزين‌هاميسي توْرپاقلارلا بير اوْلموشدولار.
حيه‌طده يئره دوشموش ايکي آغاجيميزين قيراغيندان اؤزومو ايکينجي طبقه‌يه چاتديرديم. هئچ بير سس ائشيديلميردي،نه آنامدان،نه‌ خانيميمدان، نه ده اوُشاقلاريمدان.داها قيچيمين آغريسيني اوُنوتموشدوم. اوْيان- بوُياني آراديم. ايکي اوْتاقلارين آراسيندا اوْلان دهليزين داليسيندان زئرزمي‌يه گئدن داش پيلله‌لر ساليم ايديلر. اؤزومو پيلله‌لردن زئرزمي‌يه سالديم. قارانليق و مطلق سکوت ايدي و هئچ بير يئر و هئچ بير کيمسه گؤرسنميردي. در‌حال، جيب تئلفونومون يادينا دوشدوم:» تئلفونلا بير يئره زنگ ووُرانميرام،چيراغي کي ايشله‌يير!« موْبايلين چيراغيني يانديرديم. زئرزمي‌نين بير طرفي اوُچموش، اوْرادا دوُوارا ووُردوغوموز و اوستونه آيين- اوْيون قوْيدوغوموز ايکي تاختا طبقه‌لرين هر ايکيسي، سينمادان يئره دوشموشدولر. آنام، خانيميم و ايکي اوُشاقلاريم ايسه‌هاميسي زئرزمي‌نين بير گوشه‌سينده يئره اوُزانميش، دوُوارا دايانميش و ياتميشديلار. آنام مني گؤرجک، دئدي:»قادان آليم، گلدين؟! يانئيديم، سني يوْللاديم چؤره‌ک آلماغا!«
آنامي‌قوُجاقلاديم و اؤزونون- اوُشاقلارين حال- احواللاريني سوْروشدوم. دئدي:»گؤرورسن کي‌هاميميز بوُرداييق… ساليم- سلامت!«دئديم:» بس نييه بوُرادان چيخيب- قاچمادينيز؟« آنام،آغزي‌نين قاباغينا چکديگي يايليغي قيراغا چکدي و دئدي:»بوُراني آتان چوْخ مؤحکم دوزلديب. بير ده منجه بوُرادان چيخسايديق، ائشيک تهلکه‌لي اوْلاردي!« آنام، البته هئچ ده اوْرادان چيخماغين چتين اوْلدوغونا اشاره ائتمه‌دي و ساکيت دوُردو.
خانيميم دوُوارا دايانميشدي. اوْنون اؤز-گؤزو قانلا دوْلو ايدي و باشي آنامين بئلينه باغلانان يايليقلارين بيري ايله باغلانميشدي. يايليق قانلي ايدي. بؤيوک قيزيم خانيميمين يانيندا يئره اوُزانميش و اَليني آناسينين اَلينه وئرميشدي. اوْنون دا سوْل قيچي‌نين اوْيان- بوُيانينا ايکي بالاجا تاختا قوْيولموش و آنامين بوْينونا سالان يايليقلا باغلانميشدي.اوْ بيري قيزيم، بالاجا بالام، بير آز اوْ طرفليک و يوُخاريدان گلن پيلله‌لرين اوْيانيندا، شيرين يوُخودا ياتميش ايدي.البته هر يئر بير- بيرينه دگميش و وساييللريميزين آرادان گئتميشدير.
اوْنا طرف گئتديکده،آنام دئدي:»ايشين اوْلماسين. گؤرمورسن شيرين يوُخودا ياتيب. بئليمده کي يايليق‌لارين بيريني ده اوْنون اوزونه و اوستونه چکميشم،توْز-توْرپاق گؤزل گول اوزونه قوْنماسين. گؤرورسن کي يايليق‌لار درده دگدي؟«راضي‌لاشديم. گولومسنديم و خانيميملا آييق اوْلان قيزيمين يانينا قاييتديم. خانيميمين وضعي اصلا خوْش دگيلدي. اوْنلارين يانينا چاتديقدا،‌آناما اوره‌ک- دير‌ه‌ک وئرمک اوچون دئديم:» داها اؤزونه بير يايليق قالمادي بس؟!«
دئدي:»گؤرورسن کي اوچونو وئرميشم سنين عائله‌نه، بيريني ده ساخلاميشام باشيمدا. هم ده زلزله گلندن اوْنو چکميشم‌آغزيمين قاباغينا…«
و سوْنرا دئدي:»دوُر گل بير قوُرتوم سوُ ايچ، اوْروجونو سيندير… من ده اوْروجومو آچمالييام.
آردي وار