نوروز بايرامي و هيجران داغي

بير آز گؤزلريمي يوخاري يا قالديرديم. حه يه ط ديوارينين قيرناسيندان، ذيروه سي قارلي داغا گؤزوم ساتاشدي. گون ياواش ياواش ايشيغيني يئر اوزه رينه ساچيردي . داغين چئوره سينده کي گؤيون اوزو سويوقدان قيزارميش اوشاق اوزوکيمي آل – قيرميزي اولموشدو . گئت به گئت گونون شفقي داغين آرخاسيندان يئر اوزه رينه ياييليردي ، بير نئچه ساهات ايل تحويلينه قالماميشدي. قولاغيم سس ده ايدي . آخي ائله اوگئجه يوخودا گؤرموشدوم .
بير آغ آتا مينيب، آغ- آبباق پالتار اگنينده و قارا رنگ لي يان قيليجي شاپکا باشيندا منه قارشي گليردي . سانيرديم گرچک دي . سئوينجدن گؤزلريمين گؤز ياشلاري دامجي دامجي ياناقلاريمدان آخيردي و دوداقلاريمين قيراغيندان دئمه ياسديغين اوزه رينه تؤکولوردو. بير آن يوخودان آييلديم. گؤزلريمي سيليب ديواردان آسيلان ساهاتا باخديم. گئجه نين بير ياريسين گؤستريردي . سحر واختينا ائله قالماميشدي. ياتابيلمه ديم . اوتوردوم ديزلريمي قوجاقلاديم. گؤزلريم ديوارداکي شکيلين گؤزلرينه ساتاشدي. سانکي اونون داگؤزلري منيم گؤزلريمه باخيردي. نيسگيل لي بير باخيش. باخيشلاريندا بير دونيا معنا قالانميشدي و گؤردويوم يوخونو بير داها خاطيرلاديم ، اوره ييم ديليمدن قاباق ديله گليب سيزلي يا ، سيزلي يا سؤيله ييردي هارداسان ؟ ندن مني يالنيز بوراخيب گئتدين؟ من سندن دويمادان، نه تئزمندن دويدون ؟ مه يه قرار دئييلدي منه داياق اولاسان ؟ اليمدن ياپيشيب، ييخيلماقدان قوروياسان؟ اولمايا فلک سندن دويموشدو؟...
آرزيلاديم بير بير گؤزومدن اؤنوندن صفه دوزولوب رژه گئديرديلر. کيرپيک لريم گؤزلري مين دامجي لاريني سيخيب، ياناقلاريمدان بيلک لريمين اوزه رينه آخديريردي . کئچن گونلريم ياديما دوشدو. ان اوشاقليق خاطيره لريم. ائله بيل ائله دونن ايدي. بالاجا ائويميزين قاپيسي دؤيونن زامان، گؤزله مه دن، قاپي يا ساري، قوش گئديرديم. قاپيني آچارکن اؤزومو آتيرديم اونون مهربان قوجاغينا. گولر اوزله يورولموش قول لاريني منيم بوينوما حلقه ائديردي باغرينا باسيردي. سويوق دوداقلاري لا ياناقلاريمدا، اوپوش چيچه يي اکيردي . آتاليق دويغوسو ائله بيله ايميش. بو دويغونو دريندن حيسّ ائديب آنلي ييرديم . آي آللاه دونيانين ان سئويملي آتاسي ائله منيم آتام ايدي . هئي .... اوگونلر نه تئز کئچدي ، گئتدي.
من بؤيودوکجه آتام دا ياشلانيردي. زمانين چيلغين – چيلغين آغيرليغي گوجلوآتامين بئلين بورکموشدو. زمانه نين آغير دردي و گرگين دورومو آتامين ساچلاريني قيش قاري کيمي آغارتميشدي . سانکي بو آغاريلميش ساچلار، اونون هيجران نغمه سيني، سسلنديريردي . گونلر، آيلار کئچيردي، ايللر بيتيردي ، آتامين اللري نين اوستونده کي دري لرگون به گون قيريشيردي ، دري نين آلتينداکي ياشيل دامارلار گؤزه چارپيردي . اللري نين ايچي ده، قابار باغلاييب دريسي قات – قات بير بيريندن آيريلانيردي و بوندان دولايي هر گون قئوريشيردي ، کاسيب ليق بئليني بورکموشدو و قيافه سي سينديندن ايره لي گؤرسه نيردي .
بيرگون ، بيرگون پاييزين ايلک آيي نين ايلک گونلرينده اورتا مکتب دن ائوه ساري قاييديرديم . کوچه يه گيرن زامان بير آن شوبهه لي منظره يه گؤزوم ساتاشدي. گؤردوم کوچه نين ائني – اوزونو، قوهوم – قونشوي لا دولوب . ايلاهي ندن بير بئله جماعت بيزيم کوچه يه يئغئشيبلار؟ اولمايا.... يوخ ديليم لال.... آمما ائله بيل بو جماعت بيزيم ائويميزين قاپيسينا توپلاشيب لار. اوره ييم اوزولدو... آي آللاهيم نه اوز وئريب ؟ نه اولوب ؟ اولمايا خسته آتاما بير زاد اولوب؟ آخي اوتن گئجه آتامين دورومو ياخشي دئييلدي... خسته آتاما، آنام قند شربتي حاضيرلاييب وئرميشدي... آتامين رنگي سارالميشدي و دردين گوجلوغونودن باغيريردي . آتامين حزين حزين سسينه يوخودان آييلديم. گؤردوم آنامين بير قولو آتامين باشينين آلتيندا و بير قولويلا دا اونا شربت ايچيردير. آتامين بئحال گؤزلري منه ساتاشدي. قيزيم نيگران اولما منيم هئچ نه ييم دئييل. گئت يئرينده يات. سحري مدرسه ن بئواختا قالار دييه ر کن مني موتلو ائديردي.بيلميرديم آتامين خسته ليغي ندن دير؟ آمما نييه دوقتور دئميشدي، اونون اوره ک خسته ليغي وارايدي . آمما آخي اونون پاک اوره يي ندن خسته لنه؟ بيلميرديم باشيمدا چيخميردي . آخي ياشيمدا اوقدر دئييلدي کي دوقتور دئدي ييني آنلي يام. سونرالار بيلديم کي آتامين سرطان خسته ليغي واريميش. کاسيب ليغين اوزو قارا اولسون. پولوموز اولمادان، آتام خسته ليغين قارشي سيندا داوام گتيرمه ييب دئمک دونياسين دئييشميشدي.
نه ايسه قاپي نين اؤنونده دوردوم ايچه ري گيره بيلمديم يعني آياقلاريمدا طاقت قالماميشدي. آنام تورپاقلاري باشينا سپيردي .... اي واي ائويم يئخيلدي آللاه ، باشيما کول اولدوآللاه دئييردي. عزالي آنام يانيق يانيق آغلاييردي. گؤزلري منه ساتاشارکن داهادا آرتيق دويغولاندي و سسيني قالديردي .... چانتام اليمدن اوزولوب يئره دوشدو.... بير بوز قنديلي کيمي يئريمده دؤندوم، بئينيم ايشدن دوشدو. اوره ييم چيرپينماقدان داياندي ، قوللاريم سينيق بوداق کيمي چينيمدن آسلاندي . ديليم توتولدو... يازيق اولان منم آللاه؟ ائوي ييخيلان منم آللاه؟ آتام اليمدن گئتدي ....؟ آنام منه قارشي گليب مني باغرينا باسدي ، آتان اليميزدن گئتدي قيزيم دئدي . اومودوموز کسيلدي! آنامين گؤز ياشلاري مدرسه دونومو ايسلاديردي . ايکي قولومو آنامين بوينونا حلقه ائله ديم گؤزلريم سانکي ياز بولودو اولموشدو . آنام آغلارکن اوخشاييردي ، من ده يانيق يانيق آغلاييرديم . آتاجان قوربانين اولايديم . آتاجان قاباريلميش اللرينه قوربان اولايديم .... گؤزلري نين قوربان اولايديم . يارالي و خسته اوره يي يين قورباني اولايديم . ندن بيزي يالنيز بوراخدين گئتدين ؟ نئجه آتاسيز دؤزوم؟ کاش سنين يئرينه من اؤله ايديم .... بو حال دا قونشولار و قوهوم لار، آتامي قارا پتويا بورويوب قاپيدا ساخلانميش آمبولانسين ايچينه آپاريرديلار. اؤزومو آنامدان آييرديم آتامين جنازه سي نين آرخاسي جا قاچديم. هارا آپاريرسيز؟ من ده آتام لا گئديرم دئديم. قوهوم – قونشو مني آتامين روح سوز بدنيندن آييرديرلار . آندا وئرديم، قويون لا اقل بير دفه يالنيز بير دفه گولر اوزلو آتامين چؤهره سينه باخيم و دوداقلاريندان اؤپوم...
دوداقلاريمي قويدوم سويوق دوداقلاري نين اوستونه، اللريمي سولموش ياناقلاري نا چکديم. بو منيم سون گؤروشوم اويدو. بيليرديم بوندان بري آتام خروار – خروار تورپاقلارين آلتيندا ياتيب و دينجه له جک و من گؤره بيلمه يه جم. اؤپدوم ، ياناقلاريندان ، گؤزلريندن و قيريشميش آنليندان اوپوردوم ، آغلاييرديم. قوهوملار قوللاريمدان توتوب کنارا چکديلر. اينانميرديم . سانکي بير يوخواويدو، بير خيال ، بير رؤيا . آمما نئچه گوندن سونرا بيلديم کي گرچک ايدي . آتامين اؤلومو دوغرويموش هه يه . من آتاسيز قالديم. آتاسيزليق دهشتلي بير درد . آتاسيزليق ، يالنيز ليق دير. آتاسيزليق ، ديرکسيزليق دير. آتا يعني سئوگي، آتا يعني ايستک ، آتا يعني قيزين داياغي، آتا يعني قيزين ديره يي . آخي او منيم گوجلو ديره ييمي دي. نه منيم ، ائله آنامين دا. هيجران اودو تام وجودومو آليشديردي . هيجران دردي يامان درددي . چاره سيز درد . آمما حه له ده اينانا بيلميرم کي آتام دونياسين ترک ائديب دي . ائله يئنه ده قولاغيم سس ده . ائله دئييرم آتام قاپيني دؤيوب بيرده ائوه دؤنه جک. آتامين بيرده يورقون حال لي آمما گولر اوزولو چؤهره سيني گؤره جه يه م . مني يئنه ده باغرينا باسيب اؤپه جک دير. دويغولاريني تام وجودوم لا حيسّ ائده جه يم...
هر ايلين سونوندا و يئني ايل تحويل اولاندان سونرا اوره ييم چيرپينير، آنامدان گيزلين گئديرم اؤز اوتاغيمدا ديزلريمي قوجاق لاييب آتامين شکلينه باخيب خيسين خيسين آغلاييرام، اؤز اؤزومه دئيرم نه اولاردي منيم آتام دا کناريميزدا اولاردي ، منه بايرام پالتاري آلاردي . چارشنبه آخشامي اود تونقارلاييب اودون اوستوندن آتيلارديق ، بيرليکده گئديب ايکي جوت قيرميزي بالاجا باليق آليب شوشه تونگه سالارديق، بايرام گونو مني باغرينا باسيب بايرام ليق وئرردي . بيليرسن آتاجان نئچه گون بوندان اؤنجه چارشنبه آخشامي يئر گؤي تام ايشقليق ايدي. قونشولاريميز اود تونقارلاميشديلار . اودون اوستوندن آتيليب و شادليق ائديب دئييرديلر : آتيل باتيل چارشنبه باختيم آچيل چارشنبه . آمما من قارانليق اوتاغيمدان ائشييه چيخماديم. آخي سنسيز نئجه شادليق ائدرديم؟ هانسي بختيم آچيلاردي؟ يئنه ده آغلاديم ... ثانيه لر هر بيريسي منه بير ايل گلير. ايندي ايسه هر زمان ايل بايرامي گلير، اوره ييم دؤيونور، سيخيلير، داريخيرچونکو بايرامين داخي منه معناسي يوخدور . هر زامان ياز فصلي منه پاييزدير. آخي بيليرسيز آتامي سون بهاردا الدن وئرديم . خزان يئلي آتامين عؤمرونو اليندن آلدي . ان دوغروسو منيم اليمدن آلدي. گؤزلريم يئنه ده قاپي نين اؤنون ده دير هر آن قاپي نين سسيني اؤزلويرم و آتامين گلمه سيني گؤزلويرم.
ايندي ده گؤزوم قاپينين آرخاسيندادير بيليرم کي بيرنئچه ساهات دان سونرا، ايل ته زه له نه جک دير يعني ساهات 45/8 دقيقه ده . گؤزوم گؤزونو گؤزله يير، آتاجان هارداسان گل ... آتا جان هارداسان گل... هيجران اودو مني آليشديردي هارداسان گل آتاجان ... هارداسان گل ....