پاييز گونشينين سولغون ساريمتيل ايشيغي

حبيب فرشباف

بيردن ائليارين گؤزو آتلارينا ساتاشان کيمي کندين اوجاغـينا طرف گؤتورولدو. نريمان آتـينـي اوجاق آغاجينا باغلايـيب، قوللاري قوينوندا دايانميشدي.بو آن ترلان اينجاردان دوشموش، بوزلايا- بوزلايا کنده قايـيديردي. اونون باشي‌نـين قانـي اوز- گؤزونه آخـيب يايـيلـيردي. معلم سليمانـين قولوندان توتوب زمي‌لره طرف يولا دوشدو. کؤوشنده هر زمي باشيندا بير ماتم بوساطي قورولموشدو:
دريادا گميم قالدي
بيچمه‌ديم زميم قالدي
ديرناغـيم‌لا يـئر ائشديم
منه ده قميم قالدي.
اؤتن هفته‌لرده اوشاق‌لار دؤنه- دؤنه سليمانـين داملاردا سفيل- سفيل گزدييي‌ني معلمه دئسه‌لر ده معلم – يـئنه ده گيجيک‌لري توتوب- دئـيه، اؤزونو اوندا قويماميشدي.
ايندي او: – پس رحيم نه دئيير؟! او کي پاخـيل‌لـيق ائدن اوشاق دئـييل!! – دئـيه، لاپ باشينـي ايتيرميشدي ….معلم اؤز- اؤزونه دانـيشيردي. او، ائليارين نه زاماندان اونون قاباغـيندا دايانديغـي‌نـي بيلمه‌ميشدي. ائليار اونا ياخـينلاشيب:
– آغا! دونن آخشام يـئنه ده سليمان چؤلدن قايـيداندا جمشيدين دامينا چـيخميشدي – دئـيه معلم‌ين قولاغـينا پيچـيلدادي.
معلم درسي نـئجه تامام‌لاديغـينـي بيلمه‌دي. او:
– يوخ بوگون بو ايشي مطلق آيدين‌لاشديرماق لازيمدي- دئـيه، سليمان‌ـي يانـينا چاغـيردي:
– سليمان، اونون- بونون دامينا نييه چـيخـيرسان؟ سوروش‌سادا، سليمان باشينـي آشاغـي سالـيب جاواب وئرمه‌دي. معلم يـئنه:
– سليمان! دونن گـئجه جمشيدين دامينا نييه چـيخميشدين؟ هئچ اوتانميرسان؟ – دئسه ده يـئنه سليمان لالام- لال دايانميشدي.
سليمان جاواب وئرمه‌ديکجه معلم‌ين سسي اوجالـيردي. او، نهايت اؤزوندن چـيخـيب:
– چـيخ گـئت! منيم کيلاسيما بير ده گلمه! – دئـيه، سليمانين قولوندان توتوب اونو بايـيرا توللادي.
سليمان دينمز- سؤيله‌مز کيتاب‌لارين دا گؤتورمه‌ييب کيلاسدان چـيخـيب گـئتدي ….او گوندن، سليمانين غيابيندا، هر گون اوشاق‌لاردان بيري سليمان‌دان بير پيس خبر مدرسه‌يه گتيريردي:سليمان هر گـئجه بيري‌نين داميندا گؤرونوردو.
هر کيمين نه‌يي ايتيردي‌سه- سليمان آپاردي- دئـييردي.گـئت به گـئت خبرلر بوتون کنده يايـيلدي. ايندي داها بولاق باشيندا دا صحبت سليمان‌دان گـئديردي.بير گون کدخدا، سليماني دامدا ياخالاماق قرارينا گلدي …???.پايـيز گونشي سولغون ساريمتـيل ايشيغـينـي بولودلارين آرخاسيندان يـيغـيب هئشته‌سر داغلاري‌نـين دالـيندا گؤزدن ايتدي. قارانلـيق بوتون کندي بورودو.گولو بيبي ايله ريحان خالا اللرينده بير چوماق جمشيدين داميندا تايانـين دالـيندا گيزلنديلر.
گولو بيبي سليمانـين آناسيندان آجيق آچماغا بئله بير فرصت آختارسا دا، ريحان خالا تکجه کدخدانـين تکليفي ايله بو ايشه راضي قالميشدي. ريحان خالا جمشيدين قوهومو اولسا دا او، بو ايشين سونوندان چکينيردي.
ائله بونونچون ده داما چـيخارکن اوره‌يي گوپ- گوپ دؤيونمه‌يه باشلاميشدي. ايندي قارانلـيق‌دا بير طرفدن اونون قورخوسونو آرتـيريردي. گاهدان بولودلارين آراسيندان گؤزه چارپان بير اولدوزدان باشقا، هئچ نه گؤزه گؤرونمه‌ييردي.
قويون- قوزو سسي گـئت گـئده کندين کوچه‌لريندن کسيليردي. انتظار آنلاري آغـير- آغـير کـئچيردي. قادين‌لار نه کي گؤزله‌ديلر بير خبر چـيخمادي!
ريحان خالا گولو بيبي‌نين بؤيروندن ووروب:
– آي قـيز گل چـيخاق گـئدک! بلکه هئچ بو گـئجه گلمه‌دي – دئـيه‌ن‌ده، گولو بيبي:
– يوخ! دئـييرلر هر گـئجه گلير، او، بيزوولارين چؤله آپارير، بير آزدان گليب چـيخار. – دئدي.
ايندي کندين مال- قاراسي دا چؤلدن قايـيديب، ائولره داغـيلميشدي. داها کندين کوچه‌لريندن بوتون گل- گـئت کسيلميشدي. سس‌سيزليک بوتون کنده حاکيم ايدي …
ائولرين ساريمتـيل ايشيغـي شوشه دالـيندان بايـيرا چـيخا بيلمه‌سه ده، قارانلـيغـي بير آز يومشالتميشدي. بيردن نجف‌ين ايتي دامدا هورمه‌يه باشلادي.
سليمان اويان- بويانا باخا- باخا اهمالجا جمشيدين دامينا ديرماشدي. او آياق‌لارينـي دره- دره دامين باجاسينا ياخـين‌لاشيب اونون اوستونه اييلدي.گولو بيبي ريحان خالانـي دومسوکله‌ينده اونون اللري تير- تير اسيردي.
سليمان آياغا قالخماق ايسته‌ينده، قادين‌لار چالاغان قوش کيمي اونو شيغيدي‌لار. سليمان – مني بوراخـين- دئـيه، يالوارماغا باشلادي.
قادين‌لار اونون ايکي قولوندان مؤحکم توتوب – آي گلين‌هاي! اوغرونو توتدوق.- دئـيه باغـيريرديلار.گـئجه‌نين سس‌سيزليييني پوزان بو سس کنده ولوله سالدي. هر کس الينه دهره‌دن، اوراق‌دان آلـيب، سسه طرف قاچـيردي.
کدخدا سؤيوش وئره- وئره سليمانا ياخـين‌لاشيب:– گئده! ترلان‌ين شهرده جانـي چـيخـير سنه پول گؤندرير، سن ده قودوروب‌سان قودوق؟!- دئـيه سليمانين اوزونه توپوردو.
سليمان دينمز- سؤيله‌مز باشي آشاغـي دايانميشدي.کدخدا- گـئدين جمشيدين آروادين چاغـيرين- دئـيه‌، ايبيش تـئز حيطه توللانـيب:
– سئحرناز باجي! کدخدا دئـيير »تـئز اول گل! اوغرونو توتموشوق«- دئـيه، ائوه گيردي.
سحرناز کؤرپه‌سيني اووودوب داما چـيخـينجا، دامدا آياق قويماغا يـئر قالماميشدي.‌هامي اوغرونو تانـيماغا جان آتـيردي. کيمي‌سي:– ايه کندير گتيرين قو‌ل‌لاريني باغلاياق.کيمي سي‌ده:– ايه تـئز اولون ژاندارمايا خبر وئرک. – دئـييردي.
سئحرناز ازدحامي يارا- يارا اير‌لي گـئديب الينده کي فانـيسي يوخاري قالخـيزاراق سليمانين گؤزلريندن ايکي دامجي ياناغـينا دامجي‌لادي.سئحرناز سليماني گؤرن کيمي فانـيسي يـئره توللايـيب:– بالا سنه جانـيم قوربان- دئـييب، سليمانين بوينونو قوجاق‌لادي.
هامي حئـيرت ايچينده يـئرينده داشا دؤندو.
گولو بيبي- ويي باشيما خـئـيير! هله اوغرونون بويونا دا اوخشايـير‍! آي باشي خـئـييرلي نه‌ييني آپاريب‌دير توت آل داينا – دئـدي. سئحرناز:
– آي باجي منيم نه‌ييم وار کي، بيري آپارا؟ جمشيد »نه ويلادي1« شهرده ناسازدي، نـئچه آي‌دير بيزه پول گؤندرمه‌يير، بالالاريم آجدير؛ بو يازيق بالا هر آخشام منيم ائويمه بير ال چؤره‌يي سالـير؛ من داما چـيخـينجا دا قاچـيب گـئدير. من نه کي آختاريرديم اونون کيم اولدوغونو …ريحان خالانـين آغاجي اليندن يـئره دوشموشدو.
کدخدا آلنـي‌نـين تريني آرخالـيغـي‌نـين دسته‌يي ايله تميزله‌ييردي.آي بولودون آلتـيندان چـيخـيب هر يـئري سود ايشيغـينا بوياميشدي.او گـئجه معلم‌ين اوتاغـي‌نـين چـيراغـي دان يـئري سؤکولونجه يانـيردي ….