بولگه لر سرويسي: يئني ايل بايرام تعطيل‌لري‌نين صاباح سحريسي ايشه گئتمه‌لي‌ اولان سون گونون آخشام چاغيندان‌، الينين ايچي قاشينماغا باشلاميشدي. کئچميش‌ زامانلاردان ياديندا قالميشدي،کيمسه‌نين الينين ايچي قاشينسا، قاشينما کسيلن کيمي، يوکسک پارا الين توتاجاقدير. بونو همشه قاري ننه‌سي دئير‌دي، آنجاق بير نئچه دؤنه بو سؤزو آتا- آناسيندان دا ائشيتميشدي. اوشاقليقدا الينين ايچي قاشيناندا، چوخ سئوينردي. آمما عادت اوزه‌ره، آتاسي وئرن کيچيک خشليک‌دن باشقا، بير شئي الين توتمازدي و بو دور الينين قاشينتي‌سيني تئزليکله اونوداردي. آمما بو سَفَر الينين قاشينتي‌سي آيري بير زاد ايدي و زامان کئچديکجه داها دا آرتيردي. الينين قاشينتي‌سي اونو بئزيکديرسه‌ ده، آنجاق هله ده شن گؤرونوردو. الينين ايچي، قاشييب-   ديدمکدن‌ قيزارميشدي. داهي امين‌ ايدي کسين‌ليکله، بوللو بير پول اونو گؤزله‌يير.گئجه ياتاندا، الين يئره قويوب، قاشينتي‌سينا، اليني خالچايا سورتمکله توختاقليق وئريردي.

سحر تئزدن يوخودان اوياندي، قئين‌آلتي‌سين تله‌سيک يئدي، قاشينان الي ايله چانتاسين گؤتوروب، ايشه گئتدي. ايلين بيرينجي ايش گونو اولدوغو اوچون، ساعات اون‌بيره قَدَر الينين آرتماقدا اولان قاشينتي‌سي ايله، امکداشلاري ايله گؤروشمکدن باشقا بير خبر اولمادي. ساعات اون‌بيرده الينين قاشينتي سيررينين دوغرولما واختي چاتدي. اداره‌نين مکتوبللارين اويان- بويانا آپاران کيمسه، بير سيرا مکتوبلار گتيردي. مکتوبلارين ايچينده يئني ايلين اداري حؤکملري ده گؤرونوردو. مکتوبلاري آلت- اوست ائله‌ين بير امکداشي دئدي:» اللرينه ساغليق! حؤکملري نه تئز ووروبلار. بورا باخين‌هامي‌نين دا آيليقلاري آرتيب…« داها امکداشي‌نين نه دئيه‌جه‌ييني ائشيتميردي. هله ده الي قاشينيردي، آنجاق هئچ ده اوزگون دئييلدي. اؤز- اؤزو ايله دئييردي:» اينجيمه‌ييمين دَيَري وار ايدي‌. دئيه‌سن دوغرولور…«

قاشينان الي ايله حؤکمونو آلدي. ماسا اوستونده، او بيري الينين بارماقلاري ايله، ساليب چيخدي، حئسابلادي وساده‌جه، تخمين اوزه‌ره آيليغينين يوزه سکگيز- دوققوز آرتيلماسينا يئتيشدي. راديو بير خبري يايماقدا ايدي. راديو سؤزچوسو بو ايلدن بيلديره گؤره قيمت‌لرين يوزه ايييرمي‌آرتيلماسيندان خبر وئريردي. خبرلر بيتميشدي، آنجاق الينين قاشينتي‌سي بيتمه‌ييب‌سه هئچ، او بيري الي ده قاشينماغا باشلاميشدي.